طباخ الرئيس السيسى

 

يوميات فاهم أفندى 

ألو .. أيوة يا حبيبة قلب فاهم يا نور عين فاهم ،، عاملة أيه النهاردة ، الحمد لله يا فهومتى ، طمنى يا فاهم عملت أيه فى الشغل النهاردة ، الحمد لله ماشى الحال يا روحى ، وأنت أخبار المدرسة أيه معاكى ، والله يا فاهم التلاميذ تعبونى أخر تعب عيال أشقية بجد ، ربنا يعينك يا قلبى.

 

وبينما فاهم أفندى يعيش فى الخيال مع حبيبته ، وإذا بجرس الباب يخرجه من تلك الحالة إلى الواقع ، فيطالبها بأن تغلق الهاتف الآن ليستكشف من على الباب مع وعد بالاتصال بها لاحقاً ، وبمجرد أن فتح باب شقته فإذا به هادم الملذات صديقه الحميم محروس البقال ، والذى بادره بالكلام قبل أن يسلم عليه ، بأقولك أيه يا فاهم يا حبيبى ، عايزك فى موضوع مهم جداً ، خير يا محروس ، طب ندخل الأول جوه يا فاهم ونكمل كلامنا الموضوع كبير ، أعملنا كده شوية قهوة حلوين وتعالى عشان نتكلم.

 

أعد فاهم القهوة وجلس أمام محروس ، خير يا سيدى في أيه ، بص يا فاهم " أنا نفسى اشتغل طباخ للرئيس السيسى " بصراحة أنا عندى كلام كتير عايز أقولهوله ، انتفض فاهم من مكانه وصرخ فى وجه محروس ، أنت يا محروس بتستهبل يعنى أنت جاى وتقولى عايزك فى موضوع مهم وخليتنى مكملش كلامى مع خطيبتى ، عشان الهبل بتاعك ده.

 

قام محروس من مكانه وأمسك فاهم من كتفيه ، أقعد بس يا فاهم ، أنت تملى تتعصب كده يا أخى ، اسمع بس ، بالله عليك يا فاهم ، أنت مش حاسس كده أن فى بعض المسئولين تصرفاتهم وأفعالهم عكس اللى عاوزه الرئيس هو يقول يمين وهم معندهمش إلا الشمال ، الراجل يا فاهم بيجدف لوحده وهم ولا هنا ، وفى الآخر يشيل الليلة لوحده ده ينفع ، فاهم وضع يديه على رأسه بيأس وهو يتمتم " وأيه تانى يا محروس"

يا فاهم ده أحنا عندنا مشكلة فى الكهربا وكنت أمبارح ماشى فى الشارع الاقى عواميد الكهربا منورة بالنهار ينفع كده ، والدكتور مصطفى مدبولى رئيس الوزراء ، نازل اجتماعات الاجتماع ورا التانى عشان الأسعار، والتجار ولا هم هنا ونسبة كبيرة من ارتفاع الأسعار اللى احنا شايفينه ده عشان جشعهم ،  طب فين المسئولين وفين الردع للناس دى ، هم المسئولين مستنين الرئيس يسيب اللى وراه ويلف ورا التجار ، دى ناس غريبة يا أخى ، معندهمش غير التصريحات وخلاص.

 

طب يا فاهم سيبك من ده كله ، مش الرئيس والدكتور مصطفى مدبولى كل شوية يقولوا لازم نتقشف شوية ونرشد النفقات لحد ما نعدى المرحلة الصعبة دى ، فرد فاهم رد مقتضب " أيوه يا سيدى قالوا " ، مين بقه يا فاهم بيلتزم بالكلام ده ، في ناس فعلا أه قلبها على البلد وبتنفذ تعليمات الريس ، وفى ناس تانية بصراحة عايشة فى كوكب تانى ، اهدار فلوس البلد ده عندهم مزاج ، يا عم فاهم ده فيه مسئولين بمحافظات مختلفة وأنا عارفهم بالاسم ، صرفوا ملايين على توضيب مكاتبهم وهى متوضبة أصلا ومش محتاجة ، طب ده ينفع.

 

بلاش كده يا راجل ، ده فى جهات تبع الحكومة كل شوية " هد وابنى هد وابنى " وفلوس ضايعة فى الهوا ، لازم الرئيس يعرف الناس دى ،  دول أعداء البلد دول لازم يتحاكموا ، وخد عندك بقه يا فاهم ، لو رئيس الوزراء ولا وزير قرر يزور أى محافظة ، المحافظة زى ما يكون بتتهد وتتبنى من جديد وأصرف يا عم  ، هو حد واخد باله ، والله يا فاهم رئيس الوزراء نفسه ولا الوزير لو عرفوا اللى بيحصل عشان استقبالهم بالمحافظات أو أى جهة أخرى تابعة للدولة ، مش هيقبلوا بالكلام ده أبداً ، بس مين يقولهم .

 

والله يا فاهم المشكلة فى أى أزمات مالية بنمر بيها مش سياسة رئيس ، لا دى عدم مسئولية ممن وثق بهم الرئيس ووضعهم بمناصب ولكنهم خانوا تلك الثقة ولم ينفذوا تعليماته واختاروا العمل بدماغهم وبس و لأهوائهم الشخصية وخلاص ، أقولك أيه ولا أيه يا فاهم فى حاجات كتير جداً لازم الرئيس يعرفها ، تعرف يا فاهم أهم حاجة نفسى أقولها للرئيس أيه

 

 فنظر له فاهم نظرة تعجب وهو يسأله ، أيه يا حلال العقد ، نفسى يتعمل فى كل وزارة ادارة كده تكون مهمتها تراقب كل الجهات والشركات التابعة لها ، وترصد كل حاجة مهما كانت صغيرة ، وكل شهر تعمل تقرير مفصل وترفعه للوزير والوزير يرفعه لرئيس مجلس الوزراء ، عشان الناس اللى مش قد المسئولية دى تعرف أنها تحت المراقبة ، لا وأيه كمان تبقه فى لجنة عليا تابعة للرئاسة مباشرة أو حتى رئاسة الوزراء ، مسئوليتها مراقبة تلك اللجان ، بكده والله الرئيس هيعرف دبة النملة فى البلد ، وكله هيمشى على الصراط المستقيم ، صح يا فاهم ، وبدا فاهم وهو بيتاوب عاوز ينام ،  والله كلامك منطقى يا محروس.

 

لا ده أنت شكلك نايم على الأخر أسيبك دلوقتى ونكمل كلامنا بعدين ،،  سلام ، وإذا بمحروس على باب شقة فاهم وقبيل خروجه أخرج من جيبه صورة الرئيس السيسى وأثناء نزوله على السلالم ، بدا مشغولاً بالنظر للصورة وهو يغنى " لسه عندى كلام كتير نفسى أقولهولك وتسمعنى ،، مفيش فى القلب غير الآه وجرح كبير بيوجعنى ، حب بلدى بيجرى فى دمى ،، هى أبويا وأخويا وأمى "