فاهم أفندى يكشف أخطر الأعداء للسيسى والدولة المصرية

يوميات فاهم أفندى

انتفض فاهم أفندى على صوت جرس الباب ، الذى أيقظه من نومه العميق ، واتجه مسرعاً ليجد صديقه محروس البقال أمامه ، أيه يا محروس يا أخويا ، أية اللى جايبك بدرى كده ، وقبل أن ينهى كلامه كان محروس قد ألقى بجسده على الكرسى وكلماته تسبقه ، شوفت بقه يا عم فاهم اللى كنت بأقولك عليه ، أهو الرئيس السيسى اللى كنتم بتتريقوا على اللى بيعملو طلع هو صح وأنتم كلكم غلط ، فاهم أفندى ما زال النعاس يسيطر عليه ، ولم يسمع كلمة واحدة من صديقه محروس ، فقاطعه متجهاً إلى المطبخ ، استنى بس يا محروس أعمل كوبيتين شاى يفوقونا وبعد كده نتكلم براحتنا.

دقائق معدودة وفوجئ محروس بكوباية الشاى أمامه ، وصديقه يبادره ، قولى بقه يا سيدى السيسى طلع صح فى أيه عرفنى ، فاكر يا فاهم يا أخويا لما السيسى كان بيشترى أسلحة وبيعمل توسعات وتطورات بقناة السويس ، طلعت أنت ولا زيك اتريقتوا على الراجل واتهمتوه أنه بيضيع فلوس البلد على الفاضى ، أهو الأيام لفت وأثبت ليك ولغيرك أنه كان صح ، أنتم شعب عايزين تاكلوا وتشربوا وتناموا وخلاص.

بصراحة عندك حق يا محروس ، الراجل فيه شئ لله ، تحس يا أخى أنه بيقرأ الطالع ، أهى المنطقة كلها ولعت ، والكل عامل حساب لمصر بعد تقوية الجيش وتزويده بالأسلحة الحديثة ، حتى يا جدع التوسعات والتحديثات اللى عملها فى قناة السويس ، خلت إسرائيل تفكر مليون مرة قبل ما تعمل مشروع قناة بن غوريون اللى بيقولوا عليه ده ، والقناة بقت أهم محور لطريق الحرير الصينى ، أيوه يا جدع والله عندك حق.

مش قلتلك يا فاهم ، أنا راجل سياسى وبحلل كل حاجة صح ، مش تقولى تعليم وبتاع ، الدنيا مدرسة كبيرة يا عمنا.

فاهم أفندى سكت برهه ، والتقط كوباية الشاى وتنهد تنهيدته المعهودة ، عارف يا محروس ، عدو الرئيس السيسى الحقيقى والبلد كلها ، مش إسرائيل ولا أمريكا ولا الإخوان ولا حتى الإرهاب ، لا والله دول أعداء معروفين لينا من زمان وظاهرين قدامنا ونقدر نواجههم فى أى وقت ، أحنا عدونا الأخطر على البلد بجد ، ناس عايشه بينا مبتدورش إلا على مصلحتها وبس ، وميهمهاش مصلحة البلد خالص ، عدو مثل السوس الذى ينخر فى عضد الدولة ، عدو لو دورت وراه هتلقيه السبب فى كل نكبة بتمر بيها البلد اقتصادياً وإدارياً وربما أخلاقياً فى بعض الأحيان ، عدو يعرقل أى فرصة حقيقية لبناء الدولة وتقدمها ، وأصبح عقبة تجعل البلد محلك سر ، عدو لابد من بتره بعدما تحول لسرطان يستشرى بصورة سريعة ومخيفة فى جسد معظم مؤسسات الدولة.

أيه يا عم فاهم بالراحة شوية واحدة واحدة ، مالك سخنت قوى كده ، أنت تقصد مين بالظبط فهمنى يا راجل ربنا يصلح حالك.

بص يا أبو المحاريس ، رئيس الدولة بيعين رئيس مجلس الوزراء ، والحمد لله الرئيس السيسى أتى بالرجل المناسب فى المكان المناسب ، فالدكتور مصطفى مدبولى محترم جداً وبيعمل شغله على أكمل وجه ، ورئيس الوزراء بيختار وزير لكل حاجة فى الدولة ، يعنى عندك وزير للتعليم والكهرباء والبترول والزراعة وغيرهم ، كل وزارة من دول تحتها مديريات خدمية وشركات وأحياء ومجالس مدن وخلافه ، من هنا بقه تبدأ المشكلة.

بعض المسئولين يا محروس يا أخويا ممن وثقت الحكومة فيهم ، ووضعتهم بمناصب قيادية مختلفة داخل تلك المديريات والشركات والأحياء ، يدوب الواحد منهم يقعد على الكرسى من هنا ، تحس أن المديرية أو الشركة أو الإدارة اللى بقه رئيسها ، العزبة اللى سيبهالو بابى ، ويرفع شعار " أنا ربكم الأعلى " والعياذ بالله ، ويعمل اللى هو عايزه ما هى عزبته بقه ، إهدار أموال البلد تلاقى ، المعاملة مع مرؤوسيه بعنجهية وعجرفة وقلة ذوق تلاقى ، المجاملات والمحاباة والظلم والقهر برضو تلاقى ، وده ليه لأن مفيش حد فاضى يدور وراهم ويراقب أعمالهم المسيئة ، فهؤلاء يا محروس يا أخويا ، شوية خونة ، لأنهم ببساطة كده خانوا الأمانة والثقة التى وضعتها الحكومة فيهم ، عرفت بقه أن دول أخطر عدو للرئيس السيسى والدولة بالكامل.

وقبل أن ينتهى فاهم أفندى من كلامه ، انتفض صديقه محروس من مكانه ، الوزراء هم السبب يا سيدى ، أزاى سيبين ناس زى دى تنهش فى الدولة كده ، هم فين لازم يكونوا عارفين كل اللى بيحصل فى وزراتهم ولا أيه.

لأ أنا مش معاك بقه يا محروس ، هو الوزير من دول هيسيب بقه شغله ومسئولياته ، ويقعد يراقب الناس دى بتعمل أيه ، ده كلام يا راجل ، دول مسئولين والمفروض يراعوا ضمايرهم فى أعمالهم.

أنا مش قصدى كده خالص يا فاهم ، أنا كل اللى أقصده أنه لازم يكون فى كل وزارة إدارة متخصصة فى مراقبة المديريات والأحياء والشركات ، ورصد تصرفات المسئولين بها ، ورفع تقرير شهرى مفصل لكل وزير يتضمن كل كبيرة وصغيرة عن المخالفات المالية والإدارية والأخلاقية ، والأخلاقية قبل المالية والإدارية ، عشان الوزير يعرف يحاسب الناس دى ، ويطلع على عمل من تم اختيارهم للمناصب الكبيرة ، بصراحة قبل ما نتهم الوزير من دول لازم نتأكد أنه على علم بما يفعله الناس دى مش كده برضو.

المصيبة السودا يا محروس ، إن فعلاً فى وزارات فيها إدارات المفروض تقوم بهذا العمل وتنقل للوزير كل المخالفات وسلوك المسئولين ، والمصيبة الأكبر أنها بتتعمد متنقلش الحقيقة كاملة للوزير ليه معرفش أكيد فى حاجة غلط.

خد عندك يا سيدى ، الدولة فى حالة تقشف وبتمر بظروف اقتصادية صعبة زيها زى معظم دول العالم ، ورئيس الوزراء عمال يطلع القرار ورا التانى ، يشدد على ضرورة ترشيد النفقات بجميع مؤسسات وشركات الدولة ، تبص تلاقى وكيل وزارة ولا رئيس شركة ولا رئيس حى ، ولا حتى مدير عام ، نازل هد وإعادة بناء وتجديدات عمال على بطال فى كل حتة فى المكاتب والحمامات وفوق السطح وتحت الأرض وبين المواسير وتحت البلاط حاجات تجنن ، وكل سنة يكرر نفس الموضوع فى نفس الأماكن ودوخينى يا لمونا ، وكلها فى الآخر فلوس ضايعه على الدولة ، ما هو ليه حق محدش بيسأله بتعمل كده ليه.

من الآخر كده يا محروس ، أنا حاسس أن الناس دى بتشوف الرئيس والحكومة عايزين أيه عشان الدولة تتبنى صح ، ويعملوا عكسه على طول ، ناس معندهاش ريحة الدم ، الرئيس السيسى بيحفر فى الصخر عشان الدولة تنهض وتقف على رجليها ، ودول بيفننوا أزاى يضيعوا فلوس البلد ، قرارات الدولة عندهم حبر على ورق ، والأمثلة كتيرة لمثل هذه الأشكال فى كل محافظة أو مدينة أو مركز ، شوف أنت بقه يا محروس لو كل مسئول مش مسئول من دول ، ضيع مبالغ فى الهوى كده ، الدولة تخسر فلوس قد أيه كل سنة ، بجد الله يكون فى عون الرئيس السيسى ، الراجل بيحاول يقود السفينة لبر الأمان ، بس للأسف شوية مسئولين هيغرقوها من كثرة الثقوب التى تنتشر بالسفينة بسبب أفعالهم والبحث عن مصالحهم الشخصية فقط.

أنا عايز أسألك سؤال يا محروس ، بالله عليك ، الفلوس دى لما تضيع بالشكل ده والدولة تتأثر مين هيشيل الليلة فى الآخر طبعاً رب الأسرة قائد السفينة ، ولما مجموعة مرؤوسين يتعرضوا للإهانات وقلة الذوق وغياب العدالة والظلم والقهر من رؤسائهم فى العمل ، الناس دى هتصب غضبها على مين ، طبعاً رب الأسرة قائد السفينة ، وأوعى تقولى يا محروس أنه مسئول عن كل ده وتخشلى بقه فى واقعة تعثر الدابة فى عصر عمر بن الخطاب رضى الله عنه ، الزمن يا عمنا غير الزمن والعصر غير العصر ، وتعداد السكان وقتها لا يقارن بهذه الأيام ، فرئيس أى دولة هذه الأيام الصعوبات التى تواجهه تفوق صعوبات العصور القديمة والوسطى أضعاف مضاعفة ، عرفت بقه دلوقتى إن فى ناس بينا من أخطر الأعداء على الدولة ، ولازم نتخلص منهم.

أيوه عرفت يا عم ، أستأذنك بقه لما أروح أفتح الدكان ، بس بأقولك أوعى تنسى أنت وعدتنى تحكيلى قصة " خطايا الست فردوس " ماشى ،، سلام