تركى الشيخ وكلاب غزة

يوميات فاهم أفندى

صوت مزعج يطارده يحاول أن يهرب منه دون جدوى ، إنها القيلولة التى يلجأ إليها يومياً فاهم أفندى للحصول على قسط من الراحة بعد عودته من العمل ، ولكن على ما يبدو أن على الباب من لديه إصرار ليقطع تلك الراحة ، فنهض فاهم أفندى وبمجرد أن فتح باب شقته ، حتى فوجئ بصديقه محروس البقال ، ينبح نباح الكلاب في وجهه ، ويقترب منه يريد أن ينهشه " خلاص يا فاهم أنا من النهاردة بقيت كلب " ، فاهم أفندى وهو يحاول إبعاد صديقه عنه " يا عم استنى بس كلب أيه عيب عليك يا راجل " تعالى بس أقعد وقولى مالك يا محروس في أيه.

محروس نظر لصديقه وكأنه يلومه ، أنت باين عليك نايم في العسل يا فاهم ، أنت متعرفش إن تركى الشيخ أدام الله بقاءه وأطال في عمره وزير الترفيه بالسعودية ، أعلن عن تنظيم أول مسابقة للكلاب على أرض المملكة يوم 30 ديسمبر ولمدة يومين ، لأ وأيه هيشارك فيها 250 كلب من جميع الدول لاختيار أجمل كلب في العالم.

أيوه عرفت يا أخويا ، طيب ترك الشيخ عقله طار وعايش في غيبوبة ومش حاسس بلى بيحصل لأخواتنا في غزة ، وحول أرض مقدسة بأفعاله الصبيانية لمدينة ملاهي ، رقص وشرب وعربدة ، طب أنت عايز تبقه كلب ليه هتشارك في المسابقة يعنى ، لا يا راجل مسابقة أيه اللى هشارك فيها دى ، أنا يا فاهم شايف إن الكلب اليومين دول ليه قيمة كبيرة عن البنى آدم ، أوعى تقولى كمان أنك مسمعتش عن اللى عملته جمعيات الرفق بالحيوان في عدد من دول العالم ، تخيل يا أبو المفاهيم ، الجمعيات دى أعلنت استياءها بشكل كبير من عدد الكلاب اللى ماتت بسبب القصف الإسرائيلى على قطاع غزة ، وطلبت من إسرائيل أن تفرق بين الكلاب والبنى آدمين أثناء القصف ، وإلا ستضطر الجمعيات بمقاضاة إسرائيل ، شفت البنى آدم رخص أزاى يا عم ، والنبى سبنى أهوهو.

فاهم أفندى أصابه الصمت واكتسى وجهه بحزن شديد غير من ملامحه ، وألقى بجبهته بين يديه وأسقط عينيه على الأرض ، وكأنه دخل في غيبوبة ، خرج منها وهو يقول بنبرة مخنوقة ، ييييا ، ربنا يسامحك يا محروس قلبت عليه المواجع يا أخى ، للدرجة دى وصل الحال لإهانة اللى كرمه الله سبحانه وتعالى ، للدرجة دى الكلاب بقت أغلى عند الناس دى من النساء والأطفال المسلمين اللى بتتدبح كل يوم عينى عينك ، وهم نازلين في عمل حفلات ومهرجانات ومسابقات وضحك ورقص وشرب ، ربنا يرحمنا ويخرجنا منها على خير.

عارف يا محروس ، العيب مش في ترك الشيخ ، تركى ده عمره ما هيعمل المسخرة دى من نفسه كده إلا لما يكون واخد كارت بلانش من الملك وولى عهده ، ده خدام ليهم في الآخر ، عارف أنا بجد بدأت أخاف وأقلق على مستقبل الأرض المقدسة مع الناس دى ، كل يوم يطلعوا بافتكاسة غريبة تدنس الأرض اللى كرمها ربنا سبحانه و تعالى ببيت سيدنا إبراهيم والحرمين الشريفيين ، تخيل يا فاهم تصرفات الناس دى خلت كتير من المسلمين يطلبوا مقاطعة الحج والعمرة ، شفت وصلنا لحد فين ، أحنا في كارثة كبيرة يا محروس ، المسئولون بالسعودية تحس يا أخى أنهم بينفذوا أجندة أجنبية هتضيعهم وتضيع كل المسلمين معاهم ، وربنا يستر على اللى جاى.

أنت عارف يا فاهم يا حبيبى إن الكلاب اللى هتشارك في المسابقة دى ، محجوز لهم إقامة كاملة في فنادق 7 نجوم ، ووجبات على مستوى عالى لحمة وفراخ وجمبرى ، ده حتى الاستكوزا يا راجل ، ومحدد ليهم برنامج فسح على أعلى مستوى لزيارة معالم المملكة ، وسهرات بصالات الديسكو والملاهى الليلية ، لأ ومش كده وبس تعرف الكلب اللى هيكسب المسابقة دى هياخد مليون دولار.

فاهم أفندى سمع الكلام ده من هنا ، انتفض من مكانه وصرخ في وجه صديقه ، ولسه قاعد يا راجل ورايا على البلكونة ، وبمجرد دخولهم فوجئ فاهم أفندى بكل جيرانه في البلكونات وهاتك يا هوهوه ، وبدأ هو ومحروس ينبحان بصوت عالى حتى تحولت المنطقة بالكامل لمدينة يسكنها مجموعة من الكلاب لا تتوقف عن النباح.