أرحل يا سعد

 

فاهم أفندى ،،،،،  

خرج علينا بعض مقدمي برامج " التوك شو " بعدد من القنوات الفضائية ، يقترحون على الشعب المصري ، أن يستعد من الآن لتجهيز شبيه سعد زغلول للدفع به لخوض الانتخابات الرئاسية عام 2030 ، عقب انقضاء فترة حكم الرئيس عبد الفتاح السيسي ، على اعتبار أن احتفاظ السيسي بمنصبه كرئيساً للجمهورية خلال الانتخابات المقبلة ، محسوم بشكل كبير ، بالنظر إلى كل الظروف والمعطيات المحيطة ، وأنه بالفعل رجل تلك المرحلة.

 

فإذا تخيلنا المشهد العام ، وفقاً لآرائهم ، فى مرحلة ما بعد حكم الرئيس السيسى ، وما هى التوقعات المطروحة لتلك المرحلة المستقبلية ، التى لا يعلم بظروفها غير الله سبحانه وتعالى ، لنرسم سوياً أحداثها من وحى خيالهم الافتراضي ، فها هو الشعب المصرى ، قد نجح بالفعل فى ايجاد شبيه الزعيم الوفدى سعد زغلول ، بعد عملية تفتيش دقيق فى وجوه أكثر من 40 مليون رجل مصري ، ووضعه على جهاز كشف الوطنية ، والتقاط صور له من كل جانب ، واختباره تحت ميكروسكوب الذكاء السياسى ، للتأكد أنه بالفعل سعد زغلول نفسه ، وليس شبيهه فقط .

 

وبإجماع كل طوائف الشعب المصرى ، اكتسح الانتخابات ، ونال سعد زغلول السلطة ، وانتشر الأهالى فى جميع الميادين ، يجوبون شوارع المحافظات ، وأصواتهم تتعالى " سعد سعد يحي سعد " ، وأخذ الرئيس الجديد يباشر مهام منصبه ، يشكل حكومته ، ويعقد الاجتماعات ، ويحضر المؤتمرات ، ويصدر القرارات ، ويضع التصور الكامل ، لقيادة سفينة الوطن اقتصادياً وسياسياً واجتماعياً ، وبات الأهالى يخلدون لنومهم فى هدوء ، فى ظل وجود حاكم مثل سعد زغلول على رأس السلطة.

 

وانتفض فاهم أفندى من نومه على صرخة واحدة " سعد سعد يحى سعد " ، وعاد وألقى بجسده المنهك ، وسهم نظراته يخترق سقف الحجرة ، وأخذ شريط التساؤلات يدور فى ذهنه ، هل سيخرج علينا من يعارض سياسات وقرارات الرئيس سعد زغلول ؟ وهل هناك إجماع كامل من الشعب المصرى بكل طوائفه عليه ؟ ولن تحدث أى مناوشات تهدد استقرار وأمن بلدنا ، وقبل أن يتحول طوفان الأسئلة إلى سلاسل تقيد عقله وتفكيره ،  التقط هاتفه ، حيث صديق عمره محروس البقال ، ابن الخميس عاماً ، المثقف بفضل الصحف التى ما زال مواظب ومتمسك بقراءتها ، ليتابع كل ما هو جديد.

 

أقبل محروس البقال على صديقه فاهم أفندى ، مالك بس يا فاهم ، وشك مخطوف كده ليه ، فيه أيه يا جدع ،,, قلقان يا أخي ، قلقان يا محروس على بلدنا ، خايف يطلع علينا حد يعكر عيشتنا ويهدد استقرارنا ، ويطالب بإسقاط رئيسنا " سعد باشا زغلول " ، أحنا ما صدقنا يامحروس لقينه رئيس زيه ، ولا أنت أيه رأيك يا محروس.

 

محروس التقط كوب الشاى ، وقبل أن يرشف رشفته ، أعاده مرة أخرى لمكانه ، يصحبه تنهيده اهتزت لها الجدران ، ومال بظهره رافع كتفيه ، شوف يا فاهم يا أخويا ، اللى ما يشفش من الغربال يبقه أعمى ، أنت عارف زى من عارف ومصر كلها عارفه ، اللى ما يتسموا ، مبيعجبهمش  العجب ولا الصيام فى رجب ، أنا مش عارف والله يا فاهم أزاى دى جماعة بتتكلم باسم الدين ، دى لازم يسموها جماعة " يا فيها يا أخفيها " المهم عندهم مصلحة الجماعة وبس ، ولا يفرق معاهم حاجة تانى خالص حتى لو البلد ولعت على راس اللى فيها .

 

أنت مفكر يا فاهم ، أن شوية الاعلاميين التابعين للجماعة دول ، أيام حكم الرئيس السيسى ، كانوا نازلين شتيمة فى البلد ومؤسساتها وجيشها وشرطتها ، وكم الاشاعات اللى طلعوها عن البلد ، عشان خاطر كانوا كارهين الرئيس السيسى مثلاً ، لأ يا حبيبى أصحى ، الناس دى يا أبوالمفاهيم مش مهم عندهم الرئيس مين متفرقش والله ، السيسى زى سعد وسعد هو السيسى ، الكرسى يا حبيبى هو اللى يهمهم وبس ، السلطة يا فاهم هيه اللى تهمهم ، أنت فاكر يا جدع عملوا أيه بعد ثورة 30 يونيه ، كانوا هيولعوا البلد كلها.

وأديك شفت يا عمنا ، يدوب وصلوا للحكم ، ولسه معداش سنه وحدة ، وتحس يا أخى أن مصر عندهم عاملة زى دكر البط المحمر اللى اتحطت قدام مجموعة مكلتش بقالها أسبوع ، يا راجل دول نهشوا لحم البلد فى أقل من سنه ، وداقوا طعم السلطة خلاص ، وهيفضلوا يقوموا ويناموا ويحلموا يرجعوا تانى ، حتى لو على جثث الشعب المصرى كله ، كله عندهم متاح للعودة للحكم ، يعنى مفيش مانع من سفك الدم وتعطيل المؤسسات الحيوية بالبلد ، وأنت عارف الباقى بقه ، هى دى الحقيقة يا فاهم واللى يقول عكس كده يبقه بيضحك على نفسه والناس .

 

معنى كلامك ده يا محروس ، أن أحنا الأيام اللى جاية ، هنلاقى كمية هاشتاجات ملهاش عدد على السوشيال ميديا ، بعبارة واحدة " أرحل يا سعد " وطبعاً صفحات بالجملة ، تدعو للتظاهر بالميادين والشوارع ، لإسقاط  نظام سعد زغلول ، ورفع شعارات " من نوعية " الشعب يريد اسقاط النظام " و" لا لسعد زغلول " ، واتهام رئيسناً سعد زغلول بأنه وصل للحكم عن طريق الانقلاب المدنى .

 

لأ ومش كده وبس يا فاهم يا أخويا  ، خد عندك بقه  ، اشعاعات للركب ، عن اضطهاد سعد وحكومته للمصريين ، وأكله هو ونظامه حقوق الفقراء ، والإهمال بالمستشفيات الصحية ، وتخفيض دعم التموين ، ومشروعات السكن الوهمية ، وسرقة أموال الشعب ، و......

 

وإلى هنا هم فاهم أفندى صارخاً فى وجه صديقه ، خلاص خلاص ، فهمت قصدك ، يعنى من الآخر كده زى ما قال رئيسنا سعد " مفيش فايدة "